همسات | شعر دراما

أوبريت إن كيدهن عظيم .. بقلم الشاعر / صابر الصوخي

hmasat 23 يناير, 2017 11:47 شعر دراما رابط دائم التعقيبات (0)

مالك ياقدرى 
زعـلان مـن غيـر اسبــاب
ولا انا خلاص كبرت
وبقى شكلى عامل زى الغراب
ولا كنت متجـوزنى تفـاحه
ودلـوقتى بقيـت عنـاب
فيـه ايه متـرد ياقـدرى
ولا انتـوا كــدا يارجــاله
ميملاش عينيكـم إلا التـراب

****

يووووه خليتى العيشة عذاب
حرمتينى أدخل م الباب
ليه كـل ساعـه نكــد
ليه كل دقيـقة عتـاب
ليه مفيش للحـب حصـه
ليه مفيش للعشـق منـاب
منـك لله ياقـاسـيه
بقـيت حـاسس اننا أغراب

****

نفسـى مــره تفسحـنى
وبكلـمه حلـوه تريحـنى
ولا انتا فى الشارع رميو
وجــوه البيت تجـرحنى
متلـم الـدور احسن لك
ياصـابر بقـى وسامحنى
انا زعـلانه انا تعبـانه
مفـروض. انتا تصالحني
انا بشر انا انسـانه
ليه بكلامك. ده بتدبحنى

****

مفيش صاروخـين حـنيه
او مدرعتين ملاغـــــيه
او دبابه طـايشه
تضـرب دانـه رومنسـيه
دانا قلت مره بحبك ،قولتى
انـزل هـات لنـا طعمـيه
وقلت مره بعشقك ، قــولتى
وحشانى ريحــة الملوخيه
تصدقى لو المحكمه بإيدى
كنت دبحتـك ودفعـت الديه

****

اها ، كـويس انك عرفتنى
علشـان اعمــل حســـابى
بقـى نفســك تدبحـنى
وانـا لسـه ف زهرة شبـابى
دانا كنت فكـراك ياروحى
متقـدرش تتحمل غيـابى
وبفضـل قاعــده صاحـيه
سهــرانه علـى اعصــابى
وحيات. مامتك ياروحى
لا اعملك بلاغ بتهمة إرهابى 
واوزع تذاكر الزياره
على قرايبك وعلى صحابى

****

اخص عليك ياروحى
دانا علشانك عالصعب مشيت
ولكـل الدنيـا. إتحــديت
وكتمـت ف قلـبى ودريت
انا،انابضحك وغلوتك بضحك
انا اسف لو كنت نسيت
اهـدى ياحيـاتى متتعصبيش
هجـر ناعـم شكـلى انتهـيت
وسرحت وخدتنى الشـهامه
وهـرجع تانى اقـول ياريت
هو انا معرفش اضحك معاكى
اوام نسيتى الاولاد والبيت

****

اوك ياقلبى ،تنزل تشتريلى
فـرو علـى كـام فسـتان
وكام كيلـو لحـمه ،علـى كام 
كيلو بـورى ومرجــان
وثلاثه كيـلو كفيـار
تـونه وقـرش وحيـتان 
وقفصـين حمـام محشـى
وعصافـير مـن غـير لسـان
وتوصى الحلوانى وانت راجع
يعمـل تورته بطعـم الرمان
وجاتـوا بطعــم الشيكولاته 
عشان عازمين السـت ام حنان
اه نسيت كام كيلو مكسرات
علـى كـام علبـة لبـان

****

الرحــمه خــلاص فلســــت
ومن كتر الاحــزان هيســـت
نفسى أشتريلى قميـــــــص
لـو حتى ثمـــنه رخيــــص
ولادى كانت غلطه 
ولا انا كدا غلست
دى مكنتش جـوازه دى جنازه
وفيها انا. ادبست
حــرام عليــك كفــايه
مـن كتـر الآحــزان حسسـت
ومصـدقت طلعـت اللى جـوايا
ياحيـاتى واتنفسـت
سبينى بقى انام
دانا. بتـاوب ونعسـت

****

الناس تقـرلها قصيـده
وتتغزل ف الآبيات
وانت مفيش وراك غير فلانه 
اطلقت ، وعلانه ابوهـا مـات
وكمـان غـاويه عكننتى
قربـت اطفـش من قولة هات

****

بس كدا ياقدرى خد الآنبوبه 
إملاها ، ياعيـونى من سكـات
وخـد التليفزيون صلحــه
وبـلاش شكـوى وآهـات
وخـد كـرت النــور اشحـنه
لحسـن فى الضلـمه تبــات
تاخد كمان ياقلبى ولا بكره
تاخــد باقـى. الحـاجـات


المقتطف الأول والثانى من ديوان "اتفرج يا سلام" _ دراما شعرية ممسرحة بقلم / دكتورة نهاد إبراهيم

hmasat 03 يناير, 2017 11:08 شعر دراما رابط دائم التعقيبات (0)

"اتفرج يا سلام" _ دراما شعرية ممسرحة

الديوان  البطل فيه كرسى يحكى حكايته فى قصيدة واحدة مطولة متنوعا من المونولوج والديالوج.. يحكى عن نفسه، عائلته، من جلسوا عليه، أفعاله، أخطائه، بداياته ،حياته.
 بكل جرأة وتهور يفتح الكرسى دفتر أحواله ويحكى حكاية العمر كله

إتفرّج يا سلام
ع الدنيا يا سلام
إتفرّج أوى واتمعنن
 يا سلام سلِّم يا سلام

****
الناس على كل صنف
الناس على كل لون
إسود بمبى ورمادى
 والعاقل بقى مجنون

فية ناس كما السلاطين
عايشين متهنيين 
جعانين لكن راضيين
مساكين لكن راضيين
والنوع دا م السلاطين
من جوّا حنيّنين
لكنهم يا خسارة
فى الدنيا قليّلين
بيهفُّوا على ليالينا
نضرب تعظيم سلام..
وناس كما الشياطين
فى الخَلْق شبطانين
يتفقوا بس علينا
يلعنوا أبو خاش أهالينا
وفوقينا مبرطعين
يتّكوا على رقابينا
 وعلينا نقول تمام ..

****
الناس على كل صنف
الناس على كل لون
وانا ياما فاتوا عليّا
ياما شالوا وحطوا فوقيّا
أنا الكرسى اللطيف
التحفة ابو دم خفيف
آه يا قلبى يا كتاكت
شايف دايما وساكت
وقرّب.. قرّب.. قرّب
إتفرج ع التشكيلة
أنواع كتيرة قليلة
اللى مدكوك ومأرّم
فلتان ودانه كبيرة
واللى آليط وبيتمنظر
مطيور طويل التيلة
وسخيف ورزيل
وسميج وسقيل
واللى مهبوش ومزنهر
 رغّاى وحالته نيله..

****
أرجوكم أعذرونى
بطبيعتى لسانى مؤدب
ربّانى عقلى مرتب
لكن ولاد الإيه
الباشا منهم والبيه
شَغَلونى وغلِّبونى
باعونى واشترونى
نسُّونى إسمى تَولونى
كفُّروا عيشتى خلُّونى
أتبرّى من هدومى
يا ربى عملت إيه
 علشان تخلقنى كرسى..؟!!!

****
دا انا كرسى قليل الحيلة
ماليش اخوات وحيلة
أصل امى وابويا طَفَشوا
بعد ما كبروا واتنَتَشوا
شافوا قبلى كتير بلاوى
لحد يا عينى ما نَفَشوا
والآخِر يئسوا خالص
كتبوا وصية واعتزلوا
لمّا شابت مساميرهم
واتقوِّس ضهر حيلهم
صوتهم إنبَح وزيّق
والخُلْق مِتَنْشِن ضيّق
إنهد الحيل وقَفَشوا
مابقاش ينفع تلميع
مابقاش ينفع ترقيع
خصوصا بعد ما نَشَعوا..
لكن قبل امّا يمشُّوا
قالولى يا ابنى يا كرسى..
إنت معاك المستقبل
إكمنك مش مستعمل
لكن يا خوفى منك
لسة صغيّر وأهبل
إسمعنا يا ابنى يا كرسى
وخدها نصيحة صريحة
إتنطط وانت قاعد
إتشاقى بس حاسب
حاسب من حوده ومرسى..
حوده كدّاب حلنجى
ومرسى سوابقه عندى
إسمعنا وماتمشيش
إستنى وماتجريش
كمِّل باقى النصيحة
إوعاك يا ابنى يا كرسى
 إياك من حوده ومرسى

****
بصفتى إبن مطيع
سوستتى هادية ووديع
ربّعت ايديّا حاضر
هزِّيت رجليّا حاضر
وحياتكو لارفع راسكو
أبداً مش راح تنكسروا
ولا اخلِّيكم تتوكسوا
من يومى وانا اقول حاضر
مين يطلع حوده ومرسى؟!!
دا انا أصلاً مولود كرسى
وجِدِّى راخر كرسى
وابويا بعده كرسى
يعنى قُصر الكلام
كرسى من نسل كرسى
متأصّل وابن عز
 واخِد على ريحة الوز..

****
ورغم إنى هادى
قاعد فى حالى عادى
وكافى خيرى شرى
لكنى عندى سؤال
عندى سؤال بيحيّرنى ..
عندى سؤال بيوتّرنى ..
أبداً مش عارف ليه
الناس هيموتوا عليّا؟!! 
يجروا ورايا يصاحبونى
بإيديهم بيغطُّونى
م السقعة بيلفُّونى
مع إن ساعات ضوافرهم
م الخوف بيخربشونى ..
إعجاب مالوش نهاية
محروج اقول بيحبونى
ومهما اتِّنى وادلّع
ومهما اقدم واتمزّع
يدادونى ويصالحونى
وبلونهم يدهنونى
يسيبوا الدنيا الواسعة
ع الحيطة يسحبونى
يتعافوا ويدقُّونى
وف ركنة يخنقونى
دا إسمه حب دا !
دا إسمه ود دا !!
أسألهم ليه دا كله؟
يا ناس طب ليه دا كله؟؟
يقولوا عشان يحمونى..
واللهِ أنا متلخبط
اللى باين قدّامى
إن الناس بيعزُّونى
وف كل مناسبة سعيدة
بالغالى يئيفونى
بحزام وتوب حرير
يعنى م الآخر خالص
برموشهم بيحاوطونى
فى الحر يقلّعونى
فى البرد يكلفتونى
شتا.. ربيع..خريف
كورْس مكثف إجبارى
يعنى لزماً وحتماً
يتفقوا ينجِّدونى
صيف.. ربيع..خريف
لا ممكن يعتقونى
وف لحظة صفا ورواقة
مفيش مانع يبوسونى!
أخد البوسة المتينة
واروح اتوضّى تانى
يا خوفى منهم يانى
واسألهم ليه دا كله؟
يا ناس طب ليه دا كله؟؟
يبصُّوا ويضحكولى
إجابتهم هى هى 
كدا هو من غير سبب 
كدا هو من غير لزوم
يبتسموا ويغمزولى 
وساعات يسبِّلولى 
يا جماعة اعملوا معروف
يا ولاد إيه الموضوع 
جاوبونى ع السؤال
بتعملوا ليه دا كله؟؟
أسمع نفس الكلام 
إجابتهم هى هى 
 بيقولوا عشان يحمونى ..!!

****
يا دوبك يوم واتنين
همّا يا دوبك ليلتين
والاقيهم فجأة يا سيدى
ورُّونى بختى ومصيرى..
يترزعوا فوق أنفاسى
بالذات على أم راسى
بعدين يتعازموا عليّا
إتفضل إنت الأول
والنبى لأ إنت الأول
ويغيّروا كل شوية
وهوب القعدة تِقْلِب
يقطّعوا بعض عليّا
وفى العركة القوية
يا كل سلاح مباح
اللى بيحدف بالفُرشة
اللى يناول بالبُلغة
والدنيا سداح مداح
وامّا تشتد الأزمة
باردون يشوفوا الجزمة!
ومفيش مانع فى السكة
أفندى عقله شوية
يفقع مقلب حرامية
أصل العركة القوية
عايزة تكتكة ذرية
كله بيخبط ف كله
الدنيا سداح مداح
 وكل شىء مباح..

****
أرجوكم تعذرونى
بطبيعتى طبقة كلاس
وكلامى م الكرّاس
لكن ولاد الإيه
الواطى منهم والبيه
قَرَفونى وزهقونى
ظلمونى وشرّدونى
طيّروا عقلى خبلونى
كفّروا عيشتى خلّونى
 أتحرر من هدومى..

****
والعركة اياها تحمى
وانا وحدى ف عز الزنقة
محبوس هاموت م الخنقة..
وبعد ما يقلبونى
وحقيقى يبهدلونى
ييجوا من كل حتّة
وبرقة زيادة حتّة
يشيلونى ويسندونى
ع القبلة يعدلونى
قال وانا فاكر بسذاجتى
جايين يحررونى!
أتارى بيعدلونى
لا عشان يخلّصونى
ولا لسواد عيونى
والعركة كلها ليه؟
بيهدُّوا ف بعض ليه؟؟
علشان حلم حياتهم 
 ياخدونى ويحتلّونى..!!

****
وعديكم ع اللى جرالى ..
يلزقوا فيّا سنوات
والثانية تبقى ساعات
ما خلاص مش هيسيبونى..
والتعلب فات فات
فى ديله سبع لفات
دا حتى اللى اسمه تعلب
خلّص لفّاته السبعة
وخد أحفاده التسعة
شبِّك ديله فى سنانه
وجاله يوم وفات..
وانا قاعد زى قارب
وحدانى من غير راكب
لا حصّلت التعالب
ولا حصّلت الأرانب
صاحبى فوقى مخلِّل
بيعد سبع لفّات
ألعن م التعلب فات..
أترجاهم يرمونى
أبوس إيدكم فُكُّونى
يحلفوا بالغالى عليهم
وبراس أسلاف أهاليهم
إن صحيح بيحبونى
لو ينسوا الدنيا بحالها
أنا بس بيفتكرونى
واللّه انا خايف ييجوا مرّة
يتهفُّوا ويتبنُّونى!!
مع إنى حتِّة كرسى
طلعت نزلت كرسى
كُبّه ماليش عينين
تمبل باربع رجلين
لكن عندى إيدين
وزيادة كمان لسانين
بس يا ترى مين يسمعنى؟
بس يا ترى مين يفهمنى؟؟
ملايين بيعَدُّوا عليّا
يمنعوا عنى الهوا
ياما سوُّوا وعملوا فيّا
لا حجاب نافع ولا دوا
الواحد منهم يلبد
زى لبانة غتيتة
واللّه ما يطلع بسبرتو
 ولا بودرة العفريتة..!

****
ورغم كل دول
على قد دول ودول
فية كام واحد فاكرهم
لو يوم الحشر عارفهم
عمّروا على قلبى كتير
بالزوفة وبالقناطير 
دى حاجات فى الماضى حصلت..
خيوط فكِّت واتوصلت
وذكرى عمر طويل
والماضى عدّى وفات
يعنى حكاية فلاش باك
كإنها صاحية جوّا
 ولسة روحى هناك

****
الناس على كل صنف
الناس على كل لون
آه يا قلبى با كتاكت
سامع دايما وساكت
وقرّب.. قرّب.. قرّب..
إتفرّج يا سلام
ع الدنيا يا سلام
إتفرّج أوى واتمعنن
 يا سلام لَمْلَمْ يا سلام..



© 2006 - Design by Omar Romero (all rights reserved)
استضافة مجانية من موقع مدونات عبر! | الموقع غير مسؤول عن محتويات المدونة، فقط صاحب المدونة يتحمل كامل المسؤولية عن مضامينها | التبليغ عن مخالفة | سياسة الخصوصية |نسخة الموبايل