نفسك تاكل ايه يا ابو عزه .. بقلم الشاعر / منير خاطر

نفسك تاكل ايه يا ابو عزه .. بقلم الشاعر / منير خاطر

مشاركةبواسطة hmasat في : 19 أبريل 2018

مديحه حسن رئيس مجلس الادارة
كاتب شعر فُصحى وعامية وخواطر وقصة قصيرة

نفسك تاكل إيه يابو عزه 
عندنا محشى وبطه ووزه
وفراخ بلدى ومتحمره
وكوسه باللحمه متشمره
ودابحه كمان عتقيه وديك
وحاشيه حمام كبده وفريك
مالك فين عقلك يا وليه 
نسيتى ليه تعملى ملوخيه
عامله يا حبيبى متخافش 
وبقللى فى التومه واطش
وطابخه ياسيدى رز معمر
إطلب على كيفك واتأمر
عدى ع الجزار وقولو 
عاوزين موزه ولحم بتلو
وهات كمان وانتا ف الشارع 
خمسه كيلو منبار وكوارع
هات مانجه الولاد عاوزين
ومتنساش قفصين التين

قولى صارحينى يامو حنان
مش عارف أنا ليه هفتان 
نفسى آكل ع الغدا طعميه
أو فول مهروس بالتقليه
ومخلل معمول بالدقه 
فين أيام الجبنه الحادقه
متحفش فى الفول يا حماده
ع اللقمه فولتين بزياده
قومى اقليلنا بدنجانتين 
مكلناهوش من ييجى شهرين 
وهاتيلنا فجل وجرجير 
أهو بردو نوع م التغيير
فين راحت أيام العدس
هاتى من جنبك عود الخس
نفسى بقى فى الأكل البشرى
فى العيد هبقى اعملك كشرى
هس اسكتى للناس تسمعنا 
يقولوا علينا كلنا وشبعنا
الناس مش لاقيه يا عزيزه 
أجدع جيب مفيهوشى بريزه
سكى الباب لحد يشوفنا 
ويقر علينا ويقرفنا
ياخويا هيقر على إيه
بكرا اللى عطانا هيعطيه

مديحه حسن رئيس مجلس الادارة
كاتب شعر فُصحى وعامية وخواطر وقصة قصيرة

صورة العضو الشخصية
hmasat
 
المكان:مصر
الجنس: أنثى